Զելենսկին հանդիմանել է Fox News-ին Մոսկվայից պատարագի հեռարձակման համար

Ուկրաինայի նախագահ Վլադիմիր Զելենսկին կշտամբել է ամերիկյան Fox News հեռուստաալիքին ապրիլի լույս 20-ի գիշերվա հեռարձակման համար, հայտնում է  РБК-Украина-ն։

Հեռուստաալիքը հեռարձակել է Մոսկվայում անցկացվող պատարագը, իսկ Կիևն անվանել «ռուսաստանյան»։

«Պետք է ոչ թե պատարագ հեռարձակել Մոսկվայից, այլ ճնշում գործադրել Մոսկվայի վրա, որպեսզի նրանք իրականում համաձայնեն լիակատար հրադադարի և Զատկից հետո այն պահպանեն առնվազն 30 օր, որպեսզի հնարավորություն տան դիվանագիտությանը», - գրել է Ուկրաինայի նախագահը Telegram-ի իր ալիքում։

Զելենսկին նաև շնորհակալություն է հայտնել բոլոր լրատվամիջոցներին և բլոգերներին, որոնք «լուսաբանում են «Զատկի զինադադարի» մասին ճշմարտությունը, որը Ռուսաստանի Դաշնությունը հայտարարել է և ինքն էլ խախտում է»։

Զատկի գիշերը՝ ապրիլի 20-ին, ամերիկյան Fox News հեռուստաալիքը պատարագ է հեռարձակել Մոսկվայի Քրիստոս Փրկչի տաճարից։ Ներկա են եղել ՌԴ նախագահ Վլադիմիր Պուտինը և Մոսկվայի քաղաքապետ Սերգեյ Սոբյանինը։

Ավելի փոքր «պատուհանում» Fox News-ը ցուցադրել է նաև ուկրաինական ուղղափառ եկեղեցու պատարագի հեռարձակումը Ուկրաինայի մայրաքաղաքի գլխավոր տաճարից: Բայց Կիևը տիտրերում «ռուսաստանյան» է նշվել: Մի քանի րոպե անց այս սխալն ուղղվել է։

Ուկրաինայի ԱԳՆ խոսնակ Գեորգի Տիխին արձագանքել է Fox News-ի հետ սկանդալին։ Նա հեռուստաալիքից ներողություն է պահանջել։