Բրազիլիայում ժայռը փլուզվել է զբոսաշրջային նավակների վրա․ կան զոհեր (տեսանյութ)

Բրազիլիայում զբոսաշրջիկներով նավերի վրա ժայռի փլուզման հետևանքով զոհերի թիվը հասել է 10-ի, փոխանցում է Корреспондент պարբերականը։ Ավելի վաղ հաղորդվել է 8 զոհի, 2 անհետ կորածի մասին։ Վերջիններիս մարմինները հայտնաբերվել են։ Արդեն պարզվել է մահացածներից երկուսի ինքնությունը։

Դեպքը տեղի է ունեցել շաբաթ օրը։ Կապիտոլիո քաղաքի մերձակայքում գտնվող կիրճում ժայռի մի մասը փլուզվել էր և ընկել 3 զբոսաշրջային նավակների վրա, որոնցում եղել է առնվազն 34 մարդ։ Նավակներից երկուսը խորտակվել էին։ 23 մարդ թեթև վնասվածքներով տեղափոխվել է տեղի հիվանդանոց։

Փրկարարների նախնական գնահատականով՝ էրոզիայի ենթարկված ժայռերի փլուզումը տեղի է ունեցել տարածաշրջանում առատ տեղումների պատճառով։ Հնարավոր է բնական լանդշաֆտի հետագա փլուզում։

Միջադեպի հետաքննությանը ներգրավվել են երկրի ռազմածովային ուժերը։