Հելսինկիում տեղի է ունեցել դիտարկումների ողջ պատմության ընթացքում ամենահզոր երկրաշարժը՝ 1,1 մագնիտուդ

Սուրբ Ծնունդի օրը Հելսինկիի շատ բնակիչներ վախեցել են երկրաշարժից։ Yle-ի տեղեկացմամբ՝  ոստիկանությունն ստացել է մի քանի տեղեկություններ «ուժեղ» ցնցման մասին Կյապիլյայի շրջանում։

Հելսինկիի համալսարանի սեյսմոլոգ Թոնի Վեյկոլայնենը տեղեկացրել է, որ երկրաշարժի մագնիտուդը եղել է 1,1 Ռիխտերի սանդղակով, սա ամենաուժեղ երկրաշարժն է Հելսինկիում չափումների ողջ ընթացքում։

Վեյկոլայնենը նշել է, որ քաղաքացիներից տեղեկություններ են ստացվել Վալիլա, Կյապիլյա եւ Հաագա շրջաններից։ Երկրաշարժը ցնցել է հողը տեղի ժամանակով ժամը 18.30-ին եւ շարունակվել 1 րոպեից պակաս։

Երկրաշարժի էպիկենտրոնը գտնվել է Կյապիլյա օլիմպիական գյուղում։ Երկրաշարժի պատճառը առայժմ հայտնի չէ, բայց այս փուլում այն մարդու գործունեությամբ պայմանավորված չի համարվում։

Վեյկոլայնենի խոսքով՝ բնական երկրաշարժերը Ֆինլանդիայում պայմանավորված են այնպիսի գործոններով, ինչպիսին են Ատլանտիկայի ընդլայնումը, ցամաքի բարձրացումը եւ ջրային զանգվածների լոկալ տեղաշարժերը լեռնահանքերում։