Ես բավականին բարձր թոշակ եմ ստանում և ոչ մի կոռուպցիայի մեջ երբեք չեմ եղել․ Սասուն Խաչատրյան
Սասուն Խաչատրյանի՝ Հակակոռուպցիոն կոմիտեի նախագահի պաշտոնից ազատվելուց հետո նրան փոխարինող դեռ չեն գտել, մրցույթ պետք է լինի, որը դեռ չի կայացել, իսկ ինքը՝ Սասուն Խաչատրյանն էլ դեռ հանգստանում է, որևէ աշխատանքի դեռ չի անցել։
«Ոչ մի բանով չեմ զբաղվում, դեռ հանգստանում եմ, Վահե ջան»,- MediaHub-ի հետ զրույցում ասաց պարոն Խաչատրյանը։
Ապա հետաքրքրվեց մեզանով, թե ինչպես ենք, ինչպես անցկացրինք տոները, մեզնից առաջ անցավ ու շնորհավորեց մեր անցած տոները, մինչև որ մենք սկսեցինք նորից իրենով հետաքրքրվել, թե ինչ պլաններ ունի, ինչով է մտադիր զբաղվել, արդյոք որևէ պաշտոնի առաջարկ ունի՞, թե՞ ոչ։ Բայց պարոն Խաչատրյանը նորից կրկնեց, որ որևէ բանով այս պահին չի զբաղվում, այս թեմայով մեկնաբանելու բան չունի։
-Բայց ինչ-որ պահի պիտի փող աշխատելու խնդիր էլ լուծեք, չէ՞, պարոն Խաչատրյան, Դուք էլ այնպիսի կառույց եք ղեկավարել, որ հազիվ թե որևէ մեկի մտքով անցնի, որ ինչ-որ կողքից եկամուտներ եք ունեցել, ունեցվածք եք հետ գցել, որ հետո ձեզ բավականացնի ամբողջ կյանքի ընթացքում։
-Ես բավականին բարձր թոշակ եմ ստանում, իրավապահ մարմիններում 23 տարվա ստաժ ունեմ աշխատանքի, էնպես որ, անցել եմ թոշակի։
-Այսինքն՝ շարունակելու եք այդ թոշակո՞վ «յոլա գնալ»։
-Դե, ոչ ոք չգիտի՝ վաղը իր հետ ինչ է լինելու, կամ վաղը ինքը ինչ միտք կունենա, ինչով կզբաղվի։
-Ի դեպ, Ձեր տեղը դեռ մարդ չի նշանակվել, թեպետ՝ դեռ պետք է ընտրություն լինի, և ընտրվի համապատասխան թեկնածուն։
-Այո, պետք է հանձնաժողովը ընտրի, մի հոգի ոնց որ դիմել է։
-Բայց կարծես հարմար թեկնածուներ չեն կարողանում գտնել, դժվա՞ր է Ձեզ փոխարինող գտնելը։
-Եկեք, չմեկնաբանեմ, էլի։
-Իսկ Ձեզ հետ կապված որևէ գործընթաց չկա՞, քաղաքական կամ քրեական։ Սովորաբար, ով աշխատանքից ազատվում է, մեկ էլ տեսար՝ քրեական գործ են հարուցում իր դեմ, Ձեզ հետ կապված որևէ նման բան չկա՞, կամ ռիսկ չե՞ք տեսնում, որ վաղը, մյուս օրը ինչ-որ մի բան կպարզվի, օրինակ՝ կփորփրեն ու կհայտնաբերեն, որ ինչ-որ չարաշաhումներ եք թույլ տվել, օրինակ, կամ կոռուպցիոն թեմաների մեջ եք եղել։
-Ես մի բան հաստատ կարող եմ ասել, որ ոչ մի կոռուպցիայի մեջ երբեք չեմ եղել։ Շնորհակալ եմ, այսքանը։
